Kavitayen

इन दुखियन को न चैन सपनेहुं मिल्यौ,तासों सदा व्याकुल बिकल अकुलायँगी। प्यारे ‘हरिचंद जूं’ की बीती जानि औध, प्रानचाहते चले पै ये तो संग ना समायँगी। देख्यो एक बारहू न नैन भरि तोहिं यातैं,जौन जौन लोक जैहैं तहाँ पछतायँगी। बिना प्रान प्यारे भए दरस तुम्हारे, हाय!मरेहू पै आंखे ये खुली ही रहि जायँगी।

धन्य ये मुनि वृन्दाबन बासी।दरसन हेतु बिहंगम ह्वै रहे, मूरति मधुर उपासी।नव कोमल दल पल्लव द्रुम पै, मिलि बैठत हैं आई।नैनन मूँदि त्यागि कोलाहल, सुनहिं बेनु धुनि माई।प्राननाथ के मुख की बानी, करहिं अमृत रस-पान।‘हरिचंद’ हमको सौउ दुरलभ, यह बिधि गति की आन॥

सखी री ठाढ़े नंदकिसोर।वृंदाबन में मेहा बरसत, निसि बीती भयो भोर।नील बसन हरि-तन राजत हैं, पीत स्वामिनी मोर।’हरीचंद’ बलि-बलि ब्रज-नारी, सब ब्रजजन-मनचोर॥

बँसुरिआ मेरे बैर परी।छिनहूँ रहन देति नहिं घर में, मेरी बुद्धि हरी।बेनु-बंस की यह प्रभुताई बिधि हर सुमति छरी।’हरीचंद’ मोहन बस कीनो, बिरहिन ताप करी॥

लिखाय नाहीं देत्यो पढ़ाय नाहीं देत्यो।सैयाँ फिरंगिन बनाय नाहीं देत्यो॥लहँगा दुपट्टा नीको न लागै।मेमन का गाउन मँगाय नाहीं देत्यो।वै गोरिन हम रंग सँवलिया।नदिया प बँगला छवाय नाहीं देत्यो॥सरसों का उबटन हम ना लगइबे।साबुन से देहियाँ मलाय नाहीं देत्यो॥डोली मियाना प कब लग डोलौं।घोड़वा प काठी कसाय नाहीं देत्यो॥कब लग बैठीं काढ़े घुँघटवा।मेला तमासा जाये नाहीं […]